«Ժողովուրդ» օրաթերթը գրում է. 
Հայաստանի մի շարք համայնքներ այս պահին ոչ թե ընտրված համայնքապետերն են ղեկավարում, այլ վարչապետի կողմից նշանակված պաշտոնակատարները։ Ընտրված համայնքապետերի պաշտոնավարման ժամկետի լրանալուն պես վարչապետի Նիկոլ Փաշինյանը պաշտոնակատարներ է նշանակել։ 

«Լուսավոր Հայաստան» խմբակցության անդամ Դավիթ Խաժակյանի գնահատմամբ՝ դա ոչ այլ ինչ է, քան վարչական լծակների չարաշահմամբ տեղական ինքակառավարման մարմինների ուզուրպացիա։ «Ժողովուրդ» օրաթերթի հետ զրույցում նա նշեց, որ համայնքապետի լիազորությունները ժամանակավորապես կատարողն ավագանու անդամներից պետք է նշանակվի։ 

Ընտրական օրենսգրքի դրույթին լավատեղյակ մասնագետներն էլ ասում են, որ մինչև համայանքապետի լիազորությունների ավարտը կառավարությունն արդեն պետք է նոր ընտրություններ նախաձեռներ, որպեսզի մեկի պաշտոնավարման ավարտը համընկներ մյուսի պաշտոնավարումը ստանձնելու հետ։ 

Քաղաքագետ Գագիկ Համբարյանի կարծիքով՝ Փաշինյանը պատահական չէ, որ մի շարք համայնքներում, որտեղ ընտրություններ են անցկացվել կամ անցկացվելու, պաշտոնակատարներ է նշանակել։ 

«Յուրօրինակ քաղաքականություն է, որպեսզի իր նշանակած մարդիկ մինչև ընտրությունները կարողանան եղանակ փոխել, իրենց ձեռքին լծակներ ունենան՝ ազդելու քաղաքացիների ընտրության վրա։ Ի՞նչ եղավ Գյումրիում. օրինակ՝ Փաշինյանի կողմից նշանակված անձը եկավ, ստանձնեց պաշտոնն ու միանգամից 5 հոգու ազատեց աշխատանքից՝ հասկացնելով, որ ով թպրտալ փորձի, նույն ճակատագիրը նաև իրեն է սպասվում»,- «Ժողովուրդ» օրաթերթի հետ զրույցում նշեց նա։ 

Իշխանությունը, փաստորեն, հատկապես այն համայնքներում, որտեղ ընդդիմության թեկնածուներն են պաշտոնավարում, անում է հնարավորը լծակներ բանեցնելու ու յուրայինների միջոցով տեղական մարմիններում իր դիրքերն ամրապնդելու, սեփական թեկնածուի հաղթանակն ապահովելու համար»

«Հայրենիք» կուսակցության անդամ, իրանագետ Վարդան Ոսկանյանը ֆեյսբուքյան էջում գրել է․ 


Ինձ ճանաչողները գիտեն, թե որքան լավատես եմ, սակայն ուզում եմ արձանագրել՝ եթե ոմանց թվում է, թե ինչ-որ հերթական թղթի հիման վրա Բաքվի բռնապետն էլ չի գնալու ագրեսիայի և բռնազավթման, ապա նրանք սխալվում են։ 


Ոչ մի թուղթ չի զսպելու սրան, քանզի թղթերը, պատկերավոր ասած, լոկ ժամանակ են տալիս մաքրելու զենքերը հաջորդ կրակոցի համար։ 


Հետևաբար, միայն պատրանքներով ապրողը կարող է հավատալ, որ մեր բանակը չվերականգնելով ու չարդիականացնելով, թղթի կտորներով կարելի է բացել «խաղաղության դարաշրջան»։

Միջազգայնագետ Սուրեն Սարգսյանը գրել է.

«ԱԳՆ-ն հայտարարել է, որ դիմել է Ռուսաստանին հայ-թուրքական հարաբերությունները կարգավորելու միջնորդության համար: Ի՞նչ է սա նշանակում: 

Թուրքիան մեր առջև մշտապես դրել է մի շարք նախապայմաններ: Ցեղասպանության միջազգային ճանաչումից հրաժարում, Լեռնային Ղարաբաղի զիջում Ադրբեջանին, հիմա էլ արդեն Նախիջևան-Ադրբեջան միջանցքի բացում: Սրանք հիմնական, բայց ոչ բոլոր նախապայմաններն են: Ընդ որում, երրորդ նախապայմանը միս ու արյուն է ստացել 2020թ. վերջին:

Ի՞նչ ունենք հիմա: Թուրքիայի հիմնական նախապայմաններն իրականում բավարարված են: Ցեղասպանության միջազգային ճանաչման գործընթացից հայկական կողմը հրաժարվել է: Արցախը հանձնված է: Հիմա, եթե միջանցքի նախապայմանը Թուրքիան դրել է, իսկ Հայաստանը դիմում է Ռուսաստանի միջնորդությանը, ուրեմն հայկական կողմը այդ նախապայմանն էլ է պատրաստ բավարարել: 

Չեմ բացառում, որ «առանց նախապայմանների» եզրույթը հայկական կողմը կիրառվել է «երկրորդային» նախապայմանների համար (անկախության հռչակագրի խմբագրում, զինանշանի վրայից Արարատի հեռացում, տարածքային պահանջատիրությունից հրաժարում և այլն):
Թե չէ էլ ի՞նչ նախապայման: Բոլոր հիմնական նախապայմանները բավարարել ենք, մեկն էլ շուտով կբավարարենք»:

Ուկրաինայի իշխանությունները ռազմական դրություն կմտցնեն միայն լայնամասշտաբ ներխուժման դեպքում, հայտարարել է «Ժողովրդի ծառա» կուսակցությունից Ռադայի պատգամավոր Օլեգ Սեմինսկին, փոխանցում է «ՌԻԱ Նովոստի»-ն։

«Մենք բոլորս հույս ունենք, որ դա տեղի չի ունենա, բայց մենք չպետք է խուճապի մատնվենք, գործենք սթափ գլխով եւ պատրաստ լինենք, որ դա իրականում կարող է տեղի ունենալ։ Եթե ​​դա տեղի ունենա, մենք՝ որպես պետություն, պետք է պայքարենք մինչեւ վերջ»,- ասել է պատգամավորը «Ուկրաինա 24» հեռուստաալիքի եթերում։

Ավելի վաղ Ուկրաինայի Գերագույն ռադայի նախկին պատգամավոր, Արմատական ​​կուսակցության առաջնորդ Օլեգ Լյաշկոն հայտարարել էր, որ, իր տեղեկություններով, Զելենսկին ծրագրում է դեկտեմբերի 1-ից երկրում ռազմական դրություն մտցնել։

Անկախության բոլոր տարիների ընթացքում Ուկրաինայում ռազմական դրություն մտցվել է միայն մեկ անգամ՝ 2018 թվականի նոյեմբերի վերջին` այն բանից հետո, երբ ռուս սահմանապահները Կերչի նեղուցում երեք ուկրաինական նավ կալանեցին, որոնք խախտել էին պետական ​​սահմանը։ Ռազմական դրությունը գործել է միայն տասը շրջաններում 30 օր, որից հետո այն չեղարկվել է։

Հանրային խորհրդի նախկին նախագահ Վազգեն Մանուկյանն իր նկատմամբ հարուցված դատական նիստի լուսաբանմանը ներկա լրագրողներին ասել է, որ գործող իշխանությունը ժողովրդի համար խորթ իշխանություն է, և որևիցե բան անել չի կարող։

«Այս իրավիճակը, որ տիրում է հիմա Հարավային Կովկասում և մեր սահմաներում, կայուն վիճակ չէ։ Ուշ թե շուտ դա բերելու է պատերազմի։ Անընդհատ, խոսելով խաղաղության մասին, Նիկոլ Փաշինյանը Հայաստանը տանելու է դեպի կործանարար պատերազմի»,-ասել է Վազգեն Մանուկյանը, ապա հավելել, որ նույն այդ ընթացքում Ադրբեջանի և Թուրքիայի ցանկությունները մեծանում են։

Միջազգայնագետ, «Ռուսաստանը գլոբալ քաղաքականությունում» ամսագրի գլխավորխմբագիր, «Վալդայ» միջազգային դիսկուսիոն ակումբի գիտական տնօրեն Ֆյոդոր Լուկյանովը նոր բան չի ակնկալում Սոչիում կայանալիք Փաշինյան-Պուտին-Ալիև եռակողմ բանակցություններից, քանի որ, նրա կարծիքով, հայ-ադրբեջանական տիրույթում գտնվող խնդիրները, այդ թվում՝ իրավիճակը Լեռնային Ղարաբաղի շուրջ, հեռու են լուծված լինելուց:

«Արմենպրեսի» հետ զրույցում Լուկյանովը նշել է, որ այս իրավիճակում Հայաստանի և Ադրբեջանի ղեկավարների հանդիպումը և պատերազմից հետո ընդհատված շփումների վերականգնումը ինքնին ավելի կարևոր է, քան բանակցությունների արդյունքը: Այդ հարցում ռուսաստանցի միջազգայնագետը կարևորում է թե՛ եվրոպական կողմի, թե՛ Ռուսաստանի միջնորդական դերակատարումը:

«Դժվար է ինչ-որ նոր բան ակնկալել, քանի որ իրավիճակը հեռու է կարգավորված լինելուց, և վերջին մեկ տարվա ընթացքում ձեռք բերված պայմանավորվածությունների կատարումը հիմնականում մնում է նախագծային վիճակում: Դրան գումարվում են վերջերս տեղի ունեցած սահմանային բախումները, որոնք ցույց տվեցին, թե ինչ աստիճանի երերուն վիճակում է այդ ամենը: Այնպես որ, կարծում եմ, որ այս իրավիճակում խնդիրը մեկն է՝ վերականգնել այն շփումները, որոնք ընդհատվել են մեկ տարի առաջ տեղի ունեցած պատերազմից հետո: Առանց այդ կապերի և շփումների վերականգնման, հնարավոր չէ առաջ շարժվել: Այդ իսկ պատճառով ակտիվություն են ցուցաբերում թե՛ եվրոպացիները, թե՛, բնականաբար, նաև Ռուսաստանը: Այդ տեսանկյունից հանդիպման փաստն, ըստ իս, ավելի կարևոր կլինի, քան դրա արդյունքը», – ասել է Ֆյոդոր Լուկյանովը:

ՀՀ ազգային անվտանգության ծառայության Արագածոտնի մարզային վարչության աշխատակիցների կողմից իրականացված մեծածավալ օպերատիվ-հետախուզական միջոցառումների արդյունքում փաստական տվյալներ են ստացվել, որ Արագածոտնի մարզի Արագածավան խոշորացված համայնքի ղեկավարը, պետական հատուկ ծառայություն իրականացնող անձինք, շահադիտական և անձնական այլ շահագրգռվածությունից ելնելով, չեն կատարել իրենց ծառայողական պարտականությունները, այն է՝ հաստատապես տեղեկացված լինելով համայնքի վարչական տարածքում ապօրինի ընդերքօգտագործման, ապօրինի ձեռնարկատիրության դեպքի մասին որևէ միջոց չեն ձեռնարկել ապօրինի հողօգտագործումը կանխարգելելու, կասեցնելու, վերացնելու, ինչպես նաև հանցագործության դեպքը բացահայտելու, հանցանք կատարած անձանց պատասխանատվության ենթարկելուն ուղղված միջոցներ ձեռնարկելու ուղղությամբ, որպիսի պայմաններում Արագածավան համայնքի մի շարք բնակիչներ տևական ժամանակ առանց խոչընդոտների, պաշտոնատար անձանց հովանավորչությամբ, մեկ միասնական դիտավորությամբ 2017 թվականից մինչև 2021 թվականի նոյեմբերի 16-ն ընկած ժամանակահատվածում համայնքի վարչական տարածքում, առանց ընդերքօգտագործման համապատասխան լիցենզիայի, ընդերքօգտագործման պայմանագրի և հողի գործառնական նշանակությունը փոխելու, իրականացրել են ընդերքի ապօրինի արդյունահանում, ինչի արդյունքում ապօրինի արդյունահանվել է շուրջ 754.000 կգ օբսիդիան տեսակի քարի հանքանյութ, ինչպես նաև իրականացված ապօրինի ձեռնարկատիրության արդյունքում պետությանը չի վճարվել առանձնապես խոշոր չափերով՝ 156.424.708  ՀՀ դրամի տարբեր հարկեր և այլ պարտադիր վճարներ:

Դեպքի առթիվ ՀՀ ազգային անվտանգության ծառայության քննչական դեպարտամենտում ՀՀ քրեական օրենսգրքի համապատասխան հոդվածներով հարուցվել է քրեական գործ, որը նախաքննություն կատարելու համար ուղարկվել է ՀՀ հակակոռուպցիոն կոմիտե:

Կորոնավիրուսի դեմ լիարժեք պատվաստված քաղաքացիները կարող են 6 ամիսհետո վերապատվաստվել։ Պարտադրանք չկա։ Կառավարությունում լրագրողների հետ զրույցի ժամանակ այս մասին ասաց ՀՀ առողջապահության նախարար Անահիտ Ավանեսյանը։

Հարցին՝ եթե չվերապատվաստվեն, նրանց համար սահմանափակումներ կգործե՞ն, Անահիտ Ավանեսյանն ասաց, որ նման բան դեռ չի քննարկվում։

Անդրադառնալով վերջին շրջանում տարբեր սննդային կետերում արձանագրված թունավորման դեպքերին՝ նախարարն ասաց, որ հիվանդությունների վերահսկման կենտրոնն իր գործառույթների շրջանակներում ամբողջական ուսումնասիրում է հարցը։

«Կարծում եմ՝ բոլոր դեպքերի վերլուծության արդյունքում գուցե կանխարգելիչ այցելությունների, ստուգումների կարիք լինի, որ բացառենք նման թունավորումների դեպքերը»,-ասաց Անահիտ Ավանեսյանը։

Նա ասաց, որ ամբողջ հանրապետության տարածքով ջրից պարբերաբար նմուշառում է վերցվում և այս պահին որևէ շեղում արձանագրված չէ։